दुर्गे दुर्घट भारी

दुर्गे दुर्घट भारी तुजविण संसारी । अनाथनाथे अंबे करुणा विस्तारी । वारी वारीं जन्ममरणांतें वारी । हारी पडलो आतां संकट निवारी ॥१॥

॥ धृपद ॥

जय देवी जय देवी महिषासुरमथिनी । सुरवर ईश्वरवरदे तारक संजीवनी ॥धृ॥

त्रिभुवनीं भुवनी पाहतां तुज ऐसें नाहीं । चारी श्रमले परंतु न बोलवे कांहीं । साही विवाद करितां पडिले प्रवाहीं । तें तूं भक्तांलागी पावसि लवलाहीं ॥२॥

प्रसन्नवदने प्रसन्न होसी निजदासा । क्लेशांपासुनि सोडवि तोडी भवपाशा । अंबे तुजवांचून कोण पुरविल आशा । नरहरि तल्लिन झाला पदपंकजलेशा ॥३॥